initiale_L

Glossae Scripturae Sacrae-electronicae (Gloss-e)


<17. *Liber Paralipomenon secundus*>

Capitulum 10

1
Profectus est autem Roboam in Sichem. Illuc enim cunctus Israel convenerat ut constituerent eum regem.

Sichem] scrips., Sichen Rusch, Sychem Weber
2
Quod cum audisset Ieroboam filius Nabath, qui erat in Egypto, fugerat quippe illuc ante Salomonem statim reversus est.
3
Vocaveruntque eum et venit cum universo Israel, et locuti sunt ad Roboam dicentes :
4
Pater tuus durissimo iugo nos pressit, tu leviora impera patre tuo, qui nobis gravem imposuit servitutem, et paululum de onere subleva ut serviamus tibi.
5
Qui ait : Post tres dies revertimini ad me. Cumque abisset populus,
6
{t. 2 : Erfurt, f. 117vb ; facsim., p. 234b} [Rusch, f. 117vb ] iniit consilium cum senibus qui steterant coram patre eius Salomone dum viveret dicens : Quid datis consilii ut respondeam populo ?

viveret] adviveret Weber
7
Qui dixerunt ei : Si placueris populo huic et lenieris eos verbis clementibus servient tibi omni tempore.
8
At ille reliquit consilium senum, et cum iuvenibus tractare cepit, qui cum eo nutriti fuerant et erant in comitatu eius.
marg.|  RELIQUIT  CONSILIUM  SENUM. Hos aiunt Hebrei esse Banaiam filium Ioiade et Iaiel filium Achamoni qui et Chilla vocatur quorum consilio relicto tractare cepit Roboam cum iuvenibus, id est Aduram qui in sequentibus lapidatus dicitur et similibus. Iuvenem autem non etate sed animo sepe dicimus. Non enim erat Roboam iuvenis etate sed sensu, qui quadragesimo primo etatis sue anno cepit regnare.||

Cf. 3Rg. (1Rg.) 12, 18.

eius] illius Weber
9
Dixitque ad eos : Quid vobis videtur ? Vel respondere quid debeo populo huic ? Qui dixit mihi : Subleva iugum quod imposuit nobis pater tuus ?
10
At illi responderunt ut iuvenes et nutriti cum eo in deliciis atque dixerunt : Sic loqueris populo qui dixit tibi pater tuus aggravavit iugum nostrum, tu subleva et sic respondebis eis : Minimus digitus meus grossior est lumbis patris mei.
11
Pater meus imposuit vobis iugum grave et ego maius pondus apponam. Pater meus cecidit vos flagellis. Ego vero cedam scorpionibus.
12
Venit ergo Ieroboam et universus populus ad Roboam die tertio sicut preceperat eis :
13
Responditque rex dura derelicto consilio seniorum.
marg.|  RESPONDITQUE  REX  DURA  RELICTO  CONSILIO  SENIORUM. Hic significat malos rectores in Ecclesia, qui terrenis cupiditatibus dediti curam subditorum negligunt et gaudent in multitudine sibi obsequentium. Interpretatur vero Roboam latitudo populi. Hi sunt qui latam ingrediantur viam que ducit ad mortem non angustam que ducit ad vitam. Et relicto patrum consilio quorum dicta et facta ad altitudinem perfectionis tendunt, consilio iuvenum obtemperare eligunt qui laudibus et adulationibus eos gravant qui « ceci sunt et duces cecorum » etc. Unde: « Ve tibi terra cuius rex puer est » etc.||

Mt. 15, 14.
Qo. (Ecl.) 10, 16.
14
Locutusque est iuxta iuvenum voluntatem : Pater meus grave vobis imposuit iugum quod ego gravius faciam. Pater meus cecidit vos flagellis, ego vero cedam scorpionibus.
15
Et non acquievit populi precibus. Erat enim voluntas
interl.| interl.| vel voluntatis||

voluntas] voluntatis Weber
Dei ut compleretur sermo eius quem locutus fuerat per manum Ahie Silonitis ad Ieroboam filium Nabath.
16
Populus autem universus rege duriora dicente, sic locutus {t. 2 : Erfurt, f. 118ra ; facsim., p. 235a} [Rusch, f. 118ra ] est ad eum : Non est nobis pars in David, neque hereditas in filio Isai. Revertere in tabernacula tua Israel. Tu autem pasce domum tuam David. Et abiit Israel in tabernacula sua.
17
Super filios autem Israel qui habitabant in civitatibus Iuda regnavit Roboam.
18
Misitque rex Roboam Aduram qui preerat tributis et lapidaverunt eum filii Israel et mortuus est. Porro rex Roboam currum festinavit ascendere et fugit in Hierusalem.
19
Recessitque Israel a domo David usque ad diem hanc. Factum est autem cum audisset omnis Israel, quod reversus esset Ieroboam, miserunt et vocaverunt eum congregato cetu. Et constituerunt eum regem super omnem Israel. Nec secutus est quispiam domum David preter tribum Iuda solam.

eum Rusch Editio princeps 1452 cum Clementina (3Rg. 12, 20)] om. Edmaior. | quispiam Rusch Editio princeps 1452 ] om. Edmaior. | Factum est… solam Rusch Edmaior. (Θ ΩSM Editio princeps 1452 ) = 3Rg. 12, 20] om. Edmaior. |




Comment citer cette page ?
Glossa ordinaria (2Par. 10), in : Glossae Scripturae Sacrae electronicae, ed. Martin Morard, IRHT-CNRS, 2016-2018. Consultation du 06/12/2019. (permalink : http://gloss-e.irht.cnrs.fr/php/editions_chapitre.php?livre=../sources/editions/GLOSS-liber17.xml&chapitre=17_10)