Hugo de Sancto Caro

Capitulum 48

Numérotation du verset Ez. 48,1 

Et hec nomina tribuum a finibus aquilonis iuxta viam Aethlon pergentibus Emath atrium Enon1 terminus Damasci ad aquilonem iuxta Emath et erit ei plaga orientalis mare Dan una.
1 Enon] Aenon Weber
Numérotation du verset Ez. 48,2 

et ad terminum Dan a plaga orientali usque ad plagam maris Aser una
Numérotation du verset Ez. 48,3 

et super terminum Aser a plaga orientali usque ad plagam maris Neptalim una
Numérotation du verset Ez. 48,4 

et super terminum Neptalim a plaga orientali usque ad plagam maris Manasse una
Numérotation du verset Ez. 48,5 

et super terminum Manasse a plaga orientali usque ad plagam maris Ephraim una
Numérotation du verset Ez. 48,6 

et super terminum Ephraim a plaga orientali usque ad plagam maris Ruben una
Numérotation du verset Ez. 48,7 

et super terminum Ruben a plaga orientali usque ad plagam maris Iuda una
Numérotation du verset Ez. 48,8 

et super terminum Iuda a plaga orientali usque ad plagam maris erunt primitie quas separabitis
viginti quinque millibus latitudinis et longitudinis
sicuti singule partes
a plaga orientali usque ad plagam maris
et erit sanctuarium in medio eius
Numérotation du verset Ez. 48,9 

primitie quas separastis Domino longitudo viginti quinque millibus
et latitudo decem millibus
Numérotation du verset Ez. 48,10 

he autem erunt primitie sanctuarii sacerdotum ad aquilonem viginti quinque
millia et ad mare
latitudinis decem millia sed et ad orientem latitudinis decem millia et ad meridiem longitudinis viginti quinque millia et erit sanctuarium Domini
in medio eius
Numérotation du verset Ez. 48,11 

sacerdotibus sanctuarium
erit
de filiis
Sadoc
qui custodierunt cerimonias meas et non erraverunt cum errarent filii Israel sicut erraverunt et levite
Numérotation du verset Ez. 48,12 

et erunt eis primitie de primitiis terre
sanctum sanctorum iuxta terminum levitarum
Numérotation du verset Ez. 48,13 

sed et levitis similiter iuxta fines sacerdotum viginti quinque millia longitudinis et latitudinis decem millia omnis longitudo viginti et quinque milium et latitudo decem milium
Numérotation du verset Ez. 48,14 

et non venundabunt ex eo neque mutabunt nec transferentur primitie terre quia sanctificate sunt Domino
Numérotation du verset Ez. 48,15 

quinque millia autem que supersunt in latitudine per viginti quinque millia
profana erunt
urbis in habitaculum et in suburbana et erit civitas
in medio eius
Numérotation du verset Ez. 48,16 

et hee mensure eius
ad plagam septentrionalem quingenti et quatuor millia et ad plagam meridianam quingenti et quatuor millia et ad plagam orientalem quingenti et } quatuor millia et ad plagam occidentalem quingenti et quatuor millia
Numérotation du verset Ez. 48,17 

Erunt autem suburbana civitatis ad aquilonem ducenti quinquaginta et in meridie ducenti quinquaginta et ad orientem ducenti quinquaginta et ad mare ducenti quinquaginta
Numérotation du verset Ez. 48,18 

quod autem reliquum fuerit in longitudine secundum primitias sanctuarii
decem millia in orientem et decem millia
ad occidentem erunt sicut primitie sanctuarii et erunt fruges eius in panes his qui serviunt civitati
Numérotation du verset Ez. 48,19 

servientes autem civitati operabuntur ex omnibus tribubus Israel
Numérotation du verset Ez. 48,20 

omnes primitie viginti quinque milium
per viginti quinque millia in quadrum separabuntur in primitias sanctuarii et possessionem civitatis
Numérotation du verset Ez. 48,21 

quod autem reliquum fuerit principis erit ex omni parte primitiarum sanctuarii et possessionis civitatis e regione viginti quinque milium primitiarum usque ad terminum orientalem sed et ad mare e regione viginti quinque milium usque ad terminum maris similiter in partibus principis erit et erunt primitie sanctuarii et sanctuarium templi in medio eius
Numérotation du verset Ez. 48,22 

de possessione autem levitarum et de possessione civitatis in medio partium
principis erit inter terminum Iuda et inter terminum Beniamin et ad principem . } pertinebit
Numérotation du verset Ez. 48,23 

et reliquis tribubus a plaga orientali usque ad plagam occidentalem Beniamin una
Numérotation du verset Ez. 48,24 

et contra terminum Beniamin a plaga orientali usque ad plagam occidentalem Simeon una
Numérotation du verset Ez. 48,25 

et super terminum Simeonis a plaga orientali usque ad plagam occidentis
Isachar una
Numérotation du verset Ez. 48,26 

et super terminum Isachar a plaga orientali usque ad plagam occidentalem Zabulon una
Numérotation du verset Ez. 48,27 

et super terminum Zabulon a plaga orientali usque ad plagam maris Gad una
Numérotation du verset Ez. 48,28 

et super terminum Gad ad plagam austri
in meridiem et erit finis de Thamar usque ad aquas Contradictionis
Cades hereditas contra mare magnum
Numérotation du verset Ez. 48,29 

hec est terra quam mittetis in sortem tribubus Israel et he partitiones earum ait Dominus Deus
Numérotation du verset Ez. 48,30 

et hii egressus
civitatis . } a plaga septentrionali quingentos et quatuor millia mensurabis
Numérotation du verset Ez. 48,31 

et porte civitatis in nominibus tribuum Israel porte tres a septentrione porta Ruben
una porta Iude
una porta Levi
una
Numérotation du verset Ez. 48,32 

et ad plagam orientalem quingentos et quatuor millia et porte tres porta Ioseph una porta Beniamin
una porta Dan una
Numérotation du verset Ez. 48,33 

et ad plagam meridianam quingentos et quatuor millia metieris portam Simeonis unam portam Isachar unam portam Zabulon unam
Numérotation du verset Ez. 48,34 

et ad plagam occidentalem quingenti et quatuor millia porte eorum tres porta Gad una porta Aser una
porta Neptalim una
Numérotation du verset Ez. 48,35 

per circuitum decem et octo millia et nomen civitatis
ex illa die Dominus ibidem.a
0 ¶Fons : HIERONYMUS, Commentarii in Danielem,

Capitulum 48

Numérotation du verset Ez. 48,1 
marg.| Et hec nomina Tribuum] etc. Positis, et limitatis terminis terre promissionis, dividit eam per sortes. Dividitur autem hoc capitulum in quatuor partes. Primo ponit septem sortes septem Tribuum a parte Aquilonari. Postea agit de quadam portione terre, que dividebatur in quatuor partes. Una erat in usus Sacerdotum, et fabricam Templi : alia erat in mansionem, et usus Levitarum, tertia erat ad edificium Civitatis, et ad usus civium, quarta erat portio Principis. Et hec pars incipit ibi :   [Et super terminum Iuda] etc. Tertio agit de quinque sortibus aliarum quinque Tribuum que erant ex parte Meridionali secundum situm Templi, ibi :   [Et reliquis Tribubus] etc. Quarto de portis Civitatis, ibi   [Et hi egressus Civitatis] etc. Dicit ergo.
marg.| {i} Et hec nomina Tribuum. A finibus Aquilonis] id est Tribuum que habebant sortes in finibus Aquilonaribus sive in parte Aquilonari. Qui fines Aquilonis sunt, vel terminantur.
marg.| {k} Iuxta viam Hethalon] Via enim Hethalon erat terminus terre ex parte Aquilonari, ut dictum est in precedenti capitulo Viam, dico que est, vel competit.
marg.| {l} Pergentibus Emath]  : quia per illam viam itur ad Emath. Et pergentibus.
marg.| {m} Atrium Enon terminum Damasci] vel quod est terminus Damasci, quia pertinet ad confinia Damasci.
marg.| {n} Ab Aquilone] vel   [ad Aquilonem] quia in Aquilonari latere sunt Enon et Damascus.
marg.| {5. 143rb} {o} Iuxta Emath] id est iuxta confinia Emath, non quod Emath, et Damascus sint ita vicine, sed quia fuerunt magne civitates, et habuerunt confinia lata, et dilatata, ita quod vicina forte erant, et proxima sibi ipsarum confinia. Sicut modo Roma habet terras, et civitates, et oppida multa sibi subiecta, longe, et late diffusa. Sequitur.
marg.| {p} Et erit ei plaga Orientalis Mare] id est Hec plaga Septentrionalis, in qua erant septem sortes que sequuntur, erit Orientalis, id est incipiet ab Oriente, et erit Mare, id est terminabitur ad Mare Occidentale. Sic enim erant omnes sortes disposite, quod per longum protendebantur ab Oriente in Occidentem, vel e converso ab Occidente in Orientem, quod idem est.
marg.| {q} Dan una] id est Tribui Dan erit una, et prima sors ex parte Aquilonis, Hieronymus habet litteram aliam, scilicet.   [Et erit ei plaga Orientalis a Mari Dan una] Quod sic legitur, Tribui Dan erit una pars vel possessio, vel hereditas, et erit ei, id est Tribui Dan, plaga Orientalis incipiens a Mari, quia sors Tribus Dan incipiens a Mari sive ab Occidente terminabatur in plaga Orientali in longum.
marg.| {r} Et a termino Dan] id est post terminum sortis Dan   [a plaga Orientali usque ad plagam Maris, Aser una]
marg.| {s} Et super] id est post   [terminum Aser a plaga Orientali usque ad plagam Maris, Nephthali una] {t}   Et super] id est Post   [terminum Nephthali a plaga Orientis vel Orientali usque ad plagam Maris, Manasse una]
marg.| {u} Et super] id est post   [terminum Manasse a plaga Orientali usque ad plagam Maris, Ephraim una]
marg.| {x} Et super] id est post   [terminum Ephraim a plaga Orientali usque ad plagam Maris, Ruben una]
marg.| {y} Et super] id est post   [terminum Ruben a plaga Orientali usque ad plagam Maris, Iuda una]
marg.| Sic ergo septem Tribus sunt in sinistra parte, Dan, Aser, Nephthali, Manasse, Ruben, Iuda : relique autem quinque in dextera parte : in medio autem erat portio terre potioris, et ideo nomine primitiarum nominatur, que deputatur, et Sacerdotibus, et Levitis, et Civitati, et Principi.
marg.| Et hec totalis portio habebat viginti quinque millia calamorum in latitudine, et in longitudine tantum habebat quantum alie sortes ab Oriente in Occidente, quarum longitudo non determinatur. Et de ista totali portione dicit.
marg.| {z} Et super] id est post   [terminum Iuda a plaga Orientali usque ad plagam Maris erunt primitie quas separabitis] id est quedam portio terre potioris. Primitie, dico, habentes.
marg.| {a} Viginti quinque millia] calamorum.
marg.| {b} Latitudinis] id est in latitudine.
marg.| {c} Et longitudinis, sicut singule partes] aliarum Tribuum scilicet.
marg.| Nota quod computatur portio Principis, que erat altrinsecus, et ex parte Occidentis.
marg.| Nam si tantum loqueretur de terra illa, que erat deputata Sacerdotibus, et Levitis, et Civitati, non esset verum, quia ista terra equalis erat longitudinis, et latitudinis, sicut postea dicetur.
marg.| Habebat enim vigintiquinque millia cubitos in latitudine, et longitudine.
marg.| Portio enim Civitatis habebat quinque millia latitudinis : portio Levitarum decem millia latitudinis : portio Sacerdotum similiter decem millia. Quelibet autem portio habebat {5. 143va} viginti quinque millia longitudine, quia longitudo non mutabatur. Tanta ergo latitudo omnium portionum insimul, quanta erat longitudo cuiuslibet portionis, et e converso. Quod ergo dicitur hic [Et longitudinis, sicut singule partes] et Glossa dicit (aliarum Tribuum.) Intellige sic quod illa portio Sacerdotum et Levitarum, et Civitatis cum eo quod habebat altrinsecus, scilicet cum portione Principis, erat sicut singule partes aliarum Tribuum, id est eiusdem longitudinis que protendetur.
marg.| {a} A plaga Orientali usque ad plagam Maris] id est a termino Orientali usque ad Mare mediterraneum quod erat terminus Occidentalis.
marg.| {b} Et erit Sanctuarium in medio eius] Sanctuarium, dico, id est (primitie quas separabitis Domino,) id est ad honorem, et usum Ministrorum eius. Sanctuarium enim vocat portionem Leviticam, que sancta erat, eo quod Sanctorum erat, et iuxta Templum.
marg.| Et ista portio fuit (in medio eius) id est in medio terre Promissionis, et in medio totius portionis que de omni terra Israel erat assumpta. In illa enim portione totali in latere Aquilonari portio Sacerdotum, in alio latere Meridionali portio Levitarum, sicut patet in figura divisionis terre. De longitudine autem, et latitudine portionis huius Levitarum subditur.
marg.| {c} Longitudo viginti quinque millibus] calamorum protendetur, supple   [et latitudo decem millibus] Descripta autem portione Levitarum, describit portionem Sacerdotum dicens. {d}   He autem erunt primitie Sanctuarii Sacerdotum] id est Primitie que dicentur Sanctuarium Sacerdotum, id est sancta portio, quia in illa portione erit Sanctuarium, id est Templum. Quante autem, et que sint iste primitie, dicit.
marg.| {e} Ad Aquilonem longitudinis viginti quinque millia, et ad Mare] id est ad Occidentem   [latitudinis decem millia]
marg.| {f} Sed et ad Orientem latitudinis decem millia, et ad Meridiem longitudinis viginti quinque millia] Sed queritur cum ista portio Sacerdotum per omnia equalis esset portioni Levitarum, quomodo dicatur habere viginti quinque millia calamos ad Meridiem, et similiter ad Aquilonem, et decem millia tam ad Orientem quam ad Occidentem, cum de portione Levitarum, simpliciter dicatur quod habebat viginti quinque millia in longitudine, et decem millia in latitudine. Solutio : Portio Sacerdotum non excedebat in veritate portionem Levitarum, sed ex utraque parte habebat viginti quinque millia in longitudine, et decem millia in latitudine, sed in longitudine portionis Sacerdotum habebat duo latera, Aquilonare scilicet et Meridionale. Mensurando igitur utrumque latus ab Oriente in Occidentem, invenies in utroque latere viginti quinque millia calamos. Eodem modo latitudo habebat duo latera, Occidentale, et Orientale quorum utrumque habebat decem millia, ab Aquilone in Meridiem mensurando, sicut patet si inspexeris figuram. Sequitur.
marg.| {g} Et erit Sanctuarium Domini] id est Templum.
marg.| {h} In medio eius] id est portionis Sacerdotum.
marg.| {i} Sacerdotibus Sanctuarium erit de filiis Sadoc] iustis scilicet, sicut fuit Sadoc. {k}   Qui custodierunt cerimonias meas] id est Cultum meum.
marg.| {l} Et non erraverunt cum] etc. recedendo a cultu meo, et idola colendo.
marg.| {m} Sicut erraverunt, et Levite] quia de Levitis plures erraverunt cum populo.
marg.| {n} Et erunt eis] id est Sacerdotibus qui non erraverunt.
marg.| {o} Primitie] id est portio specialis.
marg.| {5. 143vb} {p} De primitiis terre] id est de portionibus terre promissionis, vel de totali illa portione separata de omni terra.
marg.| {q} Sanctumsanctorum] erunt scilicet Sacerdotibus in portione sua, que portio Sacerdotalis est.
marg.| {r} Iuxta terminum Levitarum] quia contigua erunt portioni Levitarum : de qua subditur.
marg.| {s} Sed et Levitis similiter] erunt vel dabuntur.
marg.| {t} Iuxta fines Sacerdotum viginti quinque millia longitudinis, et latitudinis decem millia] id est portio dabitur eis habens in longitudine viginti quinque millia calamorum, et in latitudine decem millia.
marg.| {u} Omnis longitudo] id est tota longitudo huius portionis tam in latere Aquilonari, quam in Meridionali erit. {x}   Viginti et quinque millium] calamorum.
marg.| {y} Et latitudo] etc. tam in latere Orientali, quam Occidentali. {z}   Et non venundabunt ex eo] id est ex ea portione {a}   Neque mutabunt] Levite, et eodem modo intellige de Sacerdotibus. {b}   Nec transferentur primitie terre] ad alios, sed tantum erunt Ministrorum Domini et successorum eorum. Hinc autem sumitur decretum quod prohibet alienationem rerum Ecclesie, maxime hereditatum.
marg.| {c} Quia sanctificate sunt Domino] id est deputate sunt Ministris Domini.
marg.| {d} Quinque millia autem que supersunt in latitudine] etc. Sicut dictum est, Totalis illa portio habebat in latitudine viginti quinque millia, que dividebatur in tres partes, Sacerdotum, Levitarum, et Civitatis, Sacerdotum portio habebat decem millia in latitudine, similiter portio Levitarum habebat decem millia in latitudine, sicut predictum est. Ergo de viginti quinque millibus supersunt quinque millia in latitudine, et in hac portione erat Civitas, et suburbana Civitatis. Et hoc est quod dicit   [Quinque millia autem que supersunt in latitudine] extensa.
marg.| {e} Per viginti quinque millia] in longitudine, scilicet quia tanta erat longitudo huius portionis, quanta aliarum duarum, longitudo enim non mutabatur.
marg.| {f} Prophana erunt Urbis in habitaculum, et in suburbana] id est In ista portione edificabitur Civitas, ut inhabitetur in suburbanis suis. Dicuntur autem ista millia prophana, id est tota portio ista dicitur prophana, quia erat ad habitaculum Laicorum, qui dicuntur prophani, id est communes, et immundi, respectu Sacerdotum, et Levitarum, Hieronymus Prophanum est et laicum, id est vulgare, quod omni populo habitare passim licet. Unde adhuc explanat quod dixerat. {g}   Et erit Civitas in medio eius] id est istius portionis. {h}   Et he mensure eius] id est Civitatis. {i}   Ad plagam Septentrionalem quingenti] calami. {k}   Et quatuor millia] calamorum erunt.
marg.| {l} Et ad plagam Meridianam quingenti] calami.
marg.| {m} Et quatuor millia] calamorum.
marg.| {n} Et ad plagam Orientalem : Civitas ista quadrata erat equis lateribus, ita quod in quolibet latere habebat quatuor millia calamorum, et quingentos, id est in circuitu decem, et octo millia, sicut dicetur in fine cap. Cum ergo quodlibet latus Civitatis haberet tantum quatuor millia ; et quingentos calamos : latitudo, et longitudo ipsius Civitatis ab uno muro usque ad alium non habebat nisi quatuor millia, et quingentos calamos Cum ergo tota portio illa, in qua erat Civitas, haberet quinque millia calamorum in latitudine : ipsa Civitas in sua latitudine non implebat istam portionem ; sed supererant quingenti calami, ducenti scilicet, et quinquaginta calami ex una parte Civitatis, Meridionali scilicet et ducenti {5. 144ra} quinquaginta ex alia parte scilicet. Aquilonari in suburbana Civitatis. Et hoc est quod sequitur. {a}   Erunt autem suburbana Civitatis ad Aquilonem ducenti quinquaginta] calami, scilicet. {b}   Et ad Meridiem similiter ducenti quinquaginta] Et ita de Civitate et suburbanis eius implebatur tota latitudo istius portionis que erat tantum quinque millium calamorum. Sed quia longitudo huius portionis erat viginti quinque millium calamorum, et Civitas cum suburbanis suis non occupabat, nisi quinque millia calamorum : ideo remanebat de longitudine illius portionis viginti millia calamorum, decem ad Orientem, et decem ad Occidentem. Civitas enim occupabat a muro Orientali usque ad murum Occidentalem quatuor millia et quingentos. Et suburbana ex parte Orientis habebant ducentos et quinquaginta calamos : et eodem modo suburbana ex parte Occidentis habebant ducentos et quinquaginta calamos. Ergo tota Civitas cum suburbanis suis ab Oriente in Occidentem habebat quinque millia calamorum. Remanebant ergo   [ut dictum est] de totali longitudine portionis viginti millia, decem ad Orientem, et decem ad Occidentem. Et hoc est quod sequitur.
marg.| {c} Et ad Orientem ducenti quinquaginta] calami scilicet erunt in suburbana.
marg.| {d} Et ad Mare] id est ad Occidentem   [ducenti quinquaginta]
marg.| {e} Quod autem reliquum fuerit in longitudine] illius portionis ; que scilicet longitudo est. {f}   Secundum primitias Sanctuarii] id est que equalis est longitudini primitiarum Sanctuarii, id est portionum Sacerdotalium et Leviticarum, quia tanta erat longitudo istius portionis, quanta erat et aliarum duarum, scilicet Sacerdotum et Levitarum.   [Decem millia in Orientem ; et decem millia in Occidentem erunt] Sic construe.
marg.| {e} Quod reliquum fuerit] erit, supple, tante capacitatis, decem scilicet millia, etc. Et hoc erit, quia ista portio est.
marg.| {g} Sicut primitie Sanctuarii] id est tam longa est, quam longa est portio Sacerdotum et Levitarum, scilicet, viginti quinque millium calamorum. Unde hoc quod dicit   [Sicut primitie Sanctuarii] Sequitur. {h}   Et erunt fruges eius] id est istius spatii quod reliquum fuerit ad Orientem et ad Occidentem. {i}   In cibum vel in panes his qui serviunt, vel operantur Civitati] id est illis qui habent reparare muros Civitatis et ruinosa, et ea que pertinent ad usus communes Civitatis facere. Istis enim deputabatur terra illa circa Civitatem, ut alerentur frugibus eius. Determinat autem consequenter qui sunt isti et unde, qui serviunt Civitati, aliqui, scilicet de omnibus Tribubus, non de una tantum. Et hoc est quod dicit. {k}   Servientes autem vel operantes Civitati, servient vel operabuntur ex omnibus Tribubus Israel] assumpti scilicet.
marg.| {l} Omnes primitie] etc. Tres portiones divisim enumeraverat, scilicet Sacerdotum et Levitarum et Civitatis : modo insimul coniungit totum determinans quod totalis illa portio habebat viginti quinque millia ex omni parte in quadrum, sicut superius determinavimus. Et hoc est   [Omnes primitie] existentes.
marg.| {m} Viginti quinque millium] calamorum in latitudine, et extense. {n}   Per viginti quinque millia] in longitudine. {o}   In quadrum] id est in quolibet latere. {p}   Separabuntur in primitias Sanctuarii] quod ad duas partes, scilicet Sacerdotum et Levitarum. {q}   Et possessionem Civitatis] quoad tertiam partem quasi dicat. Totalis illa portio habens viginti quinque millia calamorum per quadrum deputabitur Ministris Templi, scilicet Sacerdotibus et Levitis ; et edificationi Civitatis et habitatoribus. Sacerdotes enim habuerunt unam partem ; Levite aliam, Cives tertiam. Subsequenter autem determinat de portione Principis, que erat ex utraque parte totalis portionis Sacerdotum et Levitarum, et Civitatis ad Orientem et Occidentem ; et tam lata erat portio {5. 144rb} Principis ab Aquilone in meridiem, quam lata erat illa totalis portio, scilicet viginti quinque millibus calamorum. Sed longitudo portionis Principis non determinatur : sed tanta erat et ex parte Orientali, et ex parte Occidentali, quantum extendebantur termini terre Promissionis, et secundum mensuram sortium duodecim Tribuum. Dicit ergo.
marg.| {r} Quod autem reliquum fuerit] ad Orientem et Occidentem.
marg.| {s} Principis erit ex omni parte primitiarum Sanctuarii] quantum ad duas partes, Sacerdotum, scilicet, et Levitarum.
marg.| {t} Et possessionis Civitatis] quoad tertiam. Et est sensus, quod quicquid est ex omni parte, id est in duplici latere istarum trium portionum, scil. ad Orientem et Occidentem, erit Principis. Unde alia Littera habet planius :   [Quod autem reliquum fuerit, Principis erit sive hinc, sive inde] id est sive ad Orientem, sive ad Occidentem.
marg.| {u} E regione viginti quinque millium primitiarum] Primitias vocat hic totalem illam portionem continentem tres portiones, contra quas per directum protendebatur portio Principis in latum : sed longum protendebatur in latere Orientali ab ista totali portione usque ad terminum Orientalem totius terre. In latere autem Occidentali protendebatur in longum a totali portione Sacerdotum et Levitarum et Civitatis usque ad Mare Occidentale : Et hoc est quod sequitur. {x}   Usque ad terminum Orientalem] quasi dicat Istud quod erit Principis in latere Orientali in longum, protendetur usque ad terminum totius terre. {y}   Sed et ad Mare e regione viginti quinque millium] etc. Sic lege Litteram : Sed et ad Mare, id est ad latus sive in latere Occidentali.
marg.| {b} Similiter in partibus Principis erit] sicut, supple in latere Orientali quia scilicet partes Principis in latere Occidentali extendentur in latum. {z}   E regione sive contra faciem viginti quinque millium] calamorum, quos habebat totalis portio Sacerdotum et Levitarum, et Civitatis : et extendentur in longum : {a}   Usque ad terminum Maris] id est usque ad terminum Occidentalem totius terre. {c}   Et erunt primitie Sanctuarii] id est portiones Sacerdotum, et Levitarum.
marg.| {d} Et Sanctuarium Templi] id est Sanctuarium quod est Templum, ut sit intransitiva constructio. {e}   In medio eius] id est portionis Principis quia ad Orientem et Occidentem concludebat portio Principis portiones Sacerdotum et Levitarum et Civitatis. {f}   De possessione autem Levitarum] etc. Nota quod possessio Levitarum sumitur hic large ad portionem Sacerdotum et Levitarum minorum, quia omnes erant de Tribu Levi. Dicit ergo quod pars aliqua de possessione Levitarum, id est filiorum Levi, que habebat viginti millia calamorum in latitudine. {g}   Et pars aliqua de possessione Civitatis] que habebat quinque millia calamorum in latitudine : que possessio est. {h}   In medio partium Principis] quia altrinsecus erat portio Principis ad Orientem et Occidentem.
marg.| {i} Erit in terminum Iuda et in terminum Beniamin] id est ex una parte terminabitur ad sortem Iuda, et ex alia parte terminabitur ad sortem Beniamin. Possessio enim Civitatis ex parte Aquilonari terminabitur ad sortem Iuda ; portio autem Sacerdotum ex parte Meridionali terminabitur ad sortem Beniamin, sicut patet in figura.
marg.| {k} Et ad principem pertinebit] id est ad partem Principis attinget totalis ista portio ex parte Orientali et parte Occidentali. Vel aliter et melius secundum Hieronymum : {f}   De possessione Levitarum] etc. Et est repetendum quod supra dicitur [  Quod reliquum fuerit]  : hoc modo. Quicquid reliquum fuerit de possessione Levitarum et de possessione Civitatis ; que scilicet possessio est. {h}   In medio partium Principis] Hoc non mutatur. {i}   Erit in terminum Iuda et in terminum] id est erit iuxta sortem Iuda ex una parte, et iuxta sortem Beniamin ex alia parte. {k}   Et ad Principem pertinebit] id est Principi {5. 144va} deputabitur, quasi dicat Quicquid residuum est altrinsecus de possessionibus Levitarum et Civitatis, et est inter sortem Iuda et Beniamin, erit ipsius Principis. Sequitur.
marg.| {a} Et reliquis Tribubus] etc. Tertia pars capituli in qua determinat sortes aliarum quinque Tribuum ex parte Meridionali, inter quas primas erat sors Beniamin, que contigua erat portioni Sacerdotum, ut dictum est. Dicit ergo :   [Et reliquis Tribubus] supple, erunt tales portiones.
marg.| {b} A plaga Orientali usque ad plagam Occidentalem, Beniamin una] id est Tribui Beniamin erit una portio, vel hereditas ; et prima post portionem Sacerdotum.
marg.| {c} Et contra] id est post   [terminum Beniamin, a plaga Orientali, usque ad plagam Occidentalem, Simeon una]
marg.| {d} Et super] id est post   [terminum Simeonis, a plaga Orientali usque ad plagam Occidentis, Issachar una]
marg.| {e} Et super] id est post   [terminum Issachar ; a plaga Orientali usque ad plagam Occidentalem, Zabulon una]
marg.| {f} Et super] id est post   [terminum Zabulon a plaga Orientali usque ad plagam Maris, id est Occidentis, Gad una]
marg.| {g} Et super] id est post   [terminum Gad, qui est ad plagam Austri in Meridie] id est qui est in Meridionali, et Australi plaga   [erit] supple, terminus   [et finis] sortium quia ultra non erunt sortes, nec ultra extendetur terra Promissionis. Vel aliter. {g}   Et super terminum Gad] id est post sortem Gad itur supple, {h}   Ad plagam Austri in Meridie] id est in Egyptum que est ex parte Meridiei secundum situm terre Promissionis, quasi dicat, Post sortem Gad invenitur alia regio Meridionalis, et Australis. {i}   Erit finis] id est terminus sortis Gad [  de Thamar usque ad aquas contradictionis Cades] Et nota quod supra eumdem terminum posuit totius terre Promissionis ex parte Meridionali, quem ponit hic. Et hoc bene convenit hic : quia finis omnium sortium a parte Meridiana fuit sors Gad, et ita idem est terminus totius terre, et huius sortis ex ista parte.
marg.| {k} Et hereditas] id est sors predicte Tribus Gad descendet supple, {l}   Contra Mare magnum] id est terminabitur ad Mare magnum Occidentale. Vel {k}   Hereditas] id est totalis terra Promissionis. {l}   Contra mare magnum] descendent, scilicet vel protendetur, Omnes enim sortes ab Oriente in Occidentem per longum spatium sortium descendebant vel protendebantur. {m}   Hec est terra quam mittetis in sortem Tribubus Israel] Hieronymus habet hanc Litteram   [Quam metiemini Tribubus Israel, et he partitiones] id est portiones vel sortes (earum), id est   [Tribuum : ait Dominus Deus] Sequitur.
marg.| {n} Et ingressus Civitatis] etc. Quarta pars capituli, in qua agit de portis Civitatis que erant duodecim secundum nomina duodecim Tribuum ; ita ut quelibet Tribus haberet suam portam. Unde cum duodecim essent porte, et quatuor latera Civitatis, in quolibet latere erant tres porte. Littera autem plana est. Dicit enim :   [Et hi egressus Civitatis] erunt, id est tales erunt, et tot porte in Civitate per quas erit egressus. Et quia porte tres erant in singulis lateribus : repetit de mensura laterum Civitatis, dicens.
marg.| {o} A plaga Septentrionali quingentos] calamos   [et quatuor millia mensurabis] In quo latere erunt tres porte, sicut postea dicetur.
marg.| {p} Et porte Civitatis ex omnibus Tribuum Israel] nominabuntur scilicet. Quelibet enim Tribus nominabit portam {5. 144vb} unam suo nomine.   [Aliqui habent hanc Litteram] Et porte Civitatis in omnibus Tribubus Israel, id est secundum omnes Tribus, id est duodecim erunt porte, sicut duodecim sunt Tribus.
marg.| {q} Porte tres a Septentrione, porta Ruben una, porta Iuda una, porta Levi una] Levi enim faciebat Tribum, sed non sortem.
marg.| {r} Et ad plagam Orientalem quingentos] calamos   [et quatuor millia] mensurabis scilicet.
marg.| {s} Et porte tres] erunt scilicet in illo latere.
marg.| {t} Porta Ioseph una] Ioseph fecit duas sortes, sed non fecit nisi unam Tribum quantum ad iura istius Civitatis, que hic describitur.   [Porta Beniamin una, porta Dan una]
marg.| {u} Et ad plagam Meridianam quingentos] calamos   [et quatuor millia] metieris scilicet. Vel   [Quingenti calami, et quatuor millia erunt scilicet]
marg.| {x} Porta Simeonis una, porta Issachar una, porta Zibulon una. Et ad plagam Occidentalem quingentos] calamos   [et quatuor millia] mensurabis scilicet.
marg.| {y} Et porte eorum tres] id est calamorum, id est porte illius lateris tot calamis mensurati erunt tres.   [Porta Gad una, porta Aser una, porta Nephthali una] Determinatis autem singulis lateribus cum portis suis, determinat insimul mensuram omnium laterum per circuitum Civitatis, dicens.
marg.| {z} Per circuitum Civitatis] scilicet   [decem, et octo millia calamorum erunt] Hieronymus   [Insimul sunt per quatuor latera Civitatis decem, et octo millia calamorum] id est quadraginta quatuor millia passuum, et trecenti quadraginta. Quodlibet enim latus habebat quatuor millia cala morum, et quingentos, qui faciunt undecim millia passuum, et octoginta quinque.
marg.| {a} Et nomen Civitatis ex illa die, Dominus ibidem] quasi dicat. Non vocabitur ut prius Ierosolyma, sed Adonaisam, quod in Latinum sermonem vertitur, Dominus ibidem, qui numquam recedat ab ea.
marg.| Nota quod ex fine huius visionis, et Libri patet, quod agitur de Civitate Ecclesie, quam Dominus veniens in carnem construxit, qui, et eam non deseruit, sed nobiscum est usque ad consummationem seculi.
marg.| Unde Civitas ista, et totum edificium, et quicquid in hac ultima visione continetur, sollicita, et diligenti explanatione morali vel mystica indigerent, si cui divinitus aperiretur. Neque enim secundum fabulas Iudeorum talis Civitas, ad Litteram, vel Templum, vel distributio terre futura est : maxime cum multa dicantur, que absurde ad Litteram intelligerentur, ut de aquis que de Hierusalem fluant in Iordanem, et in Mare mortuum influant, idque in dulcedinem vertant, et de arboribus riparum, quod per singulos menses afferant novos fructus, et de aliis consimilibus. Illud etiam notandum est, quod aliter describuntur sortes, et ordinantur hic quam fuerunt ad Litteram ordinate a Moyse, et Iosue. Aliter etiam ordinantur Tribus circa Civitatem, quam in circuitu Tabernaculi fuerunt ordinate a Moyse in Numeris. Et hoc satis patet ex Glossa.
prol.| Explicit Postilla Domini Hugonis Cardinalis super Ezechielem.


Comment citer cette page ?
Martin Morard, ed., Hugo de Sancto Caro. Postilla in totam Bibliam (Ez. Capitulum 48), in : Sacra Pagina, IRHT-CNRS, 2024. Consultation du 26/12/2024. (Permalink : https://gloss-e.irht.cnrs.fr/php/editions_chapitre.php?id=hug&numLivre=37&chapitre=37_48)
Signaler un complément d'information

Notes :